अजीजभाई शेख / राहाता:
तालुक्यातील प्रवरानगर येथील रयत शिक्षण संस्थेच्या महात्मा गांधी शैक्षणिक संकुलात प्राचार्य अंगद काकडे व डॉ. स्नेहलताई म्हस्के यांच्या प्रमुख उपस्थितीत सखी सावित्री समिती व शालेय विद्यार्थी समितीची स्थापना करण्यात आली. सर्वप्रथम कार्यक्रमाचे अध्यक्ष प्राचार्य अंगद काकडे व डॉ. स्नेहलताई म्हस्के यांच्या हस्ते क्रांतीज्योती सावित्रीबाई फुले व रयत माऊली लक्ष्मीबाई भाऊराव पाटील यांच्या प्रतिमेस पुष्पहार अर्पण करून अभिवादन करण्यात आले. कार्यक्रमाचे प्रास्ताविक व स्वागत उपप्राचार्य अलका आहेर यांनी केले.
सखी सावित्री समितीच्या सचिव दीप्ती रुपवते यांनी समितीच्या कार्याची ओळख करून दिली. डॉ. स्नेहलताई म्हस्के यांनी आपल्या मनोगतात सांगितले की, आजच्या स्त्रीने समाजात जागृत राहण्याची गरज असून अन्याय आणि शोषणाविरुद्ध प्रखर आवाज उठविणे तसेच स्वसुरक्षा आणि समतोल आहार घेऊन आरोग्याची काळजी घेणे आवश्यक आहे. प्राचार्य अंगद काकडे यांनी महिला आणि शालेय विद्यार्थी सुरक्षेच्या बाबतीत काळजी घेण्याचे आवाहन केले. यावेळी कमल चेचरे, महेश वाकचौरे, प्रभारी पर्यवेक्षक संजय ठाकरे यांच्यासह पालक, विद्यार्थी मोठ्या संख्येने उपस्थित होते. कार्यक्रमाचे सूत्रसंचालन डॉ. शरद दुधाट यांनी केले तर सचिव देवेश आहेर यांनी उपस्थितांचे आभार मानले.
*संकलन
समता न्यूज सर्व्हिसेस, श्रीरामपूर - ९५६११७४१११
