भारत दौऱ्यावर आलेल्या बांगलादेशविरुद्ध टिम इंडियात दोन नवे वेगवान गोलंदाज निवडले गेले आहेत. आयपीएल, दुलिप ट्रॉफी व देशांतर्गत स्पर्धात प्रतिस्पर्धी फलंदाजांना सतावून स्वतःला सिध्द केल्यानंतर निवड समितीलाही त्यांची दखल घ्यावी लागली. अश्या या डाव्या उजव्या हाताच्या वेगवान गोलंदाजांविषयी सदर लेखात जाणून घेऊया.
आयपीएल २०२३ मध्ये यश दयालची बदनामी झाली, कारण रिंकू सिंगने एका षटकात त्याच्याविरुद्ध सलग पाच षटकार मारले. यानंतर या डाव्या हाताच्या वेगवान गोलंदाजाला खूप ट्रोल करण्यात आले. सोशल मीडियावर शिवीगाळही झाली. हे त्याच्यासाठी नैराश्यासारखे होते आणि तो आजारी पडला. त्याने अनेक किलो वजन कमी केले होते. त्या हंगामानंतर यश दयालला गुजरात टायटन्सनेही सोडले होते, परंतु त्यानंतर रॉयल चॅलेंजर्स बंगलोर म्हणजेच आरसीबीने यश दयालवर विश्वास व्यक्त केला आणि त्याचा संघात समावेश केला. आयपीएल २०२४ मध्ये चांगली कामगिरी करण्यापूर्वी तो देशांतर्गत क्रिकेट खेळल आणि आयपीएलनंतरही तो देशांतर्गत क्रिकेटमध्ये दिसला व चमकलाही याच आधारावर त्याची प्रथमच भारताच्या कसोटी संघात निवड झाली आहे.
यश दयाल १९ सप्टेंबरपासून बांगलादेश विरुद्ध खेळल्या जाणाऱ्या दोन सामन्यांच्या कसोटी मालिकेचा भाग आहे. पहिल्यांदाच त्याची भारतीय संघात निवड झाली आहे. मात्र, या कसोटी मालिकेतील पहिल्या सामन्यात त्याला संधी मिळण्याची शक्यता नाही, कारण पहिल्या सामन्यात जसप्रीत बुमराह आणि मोहम्मद सिराज हे वेगवान गोलंदाज म्हणून खेळतील अशी अपेक्षा आहे. याशिवाय दोन फिरकीपटू खेळताना दिसतील, जे आर. अश्विन आणि रवींद्र जडेजा असतील. फलंदाजीची खोली लक्षात घेता अक्षर पटेलची निवड केली जाऊ शकते. या कारणाने यश दयाल पहिल्या सामन्यात खेळताना दिसण्याची शक्यता नाही. जसप्रीत बुमराहला दुसऱ्या सामन्यात विश्रांती दिली तर यश दयाल किंवा आकाश दीप यांना प्लेइंग इलेव्हनमध्ये स्थान मिळू शकते.
२६ वर्षीय यश दयाल देखील दुलीप ट्रॉफी २०२४ मध्ये खेळला. त्याने दोन्ही डावात गोलंदाजी करत एकूण चार बळी घेतले. संघ निवड समितीकडून हा एक सरप्राईज कॉल होता, कारण त्याचा स्पर्धकांच्या यादीत समावेश नव्हता. मात्र, अर्शदीप सिंगने इंडिया क विरुद्धच्या दोन्ही डावांत प्रत्येकी एक विकेट घेतली. एकदिवसीय मालिकेतही त्याची कामगिरी चांगली झाली नाही. अशा स्थितीत त्याला बाजूला करण्यात आले आणि यश दयाल याची थेट भारतीय संघात निवड समितीने निवड केली.
दुलीप ट्रॉफीच्या पहिल्या फेरीच्या सामन्यात भारतीय संघाचा वेगवान गोलंदाज आकाशदीपने चमकदार कामगिरी केली. भारत अ आणि भारत ब यांच्यात झालेल्या सामन्यात आकाशदीपने एकूण नऊ विकेट घेतल्या. रेड-बॉल फॉरमॅटमध्ये त्याने मिळविलेल्या यशाचे श्रेय त्याने भारतीय सहकारी मोहम्मद शमीला दिले.
भारत अ संघाकडून खेळताना आकाशदीपने चमकदार कामगिरी केली. त्याने पहिल्या डावात ६० धावांत चार बळी घेतले, तर दुसऱ्या डावात ५६ धावांत पाच बळी घेतले. आकाशच्या चमकदार कामगिरी नंतरही भारत अ संघाला भारत ब संघाकडून ७६ धावांनी पराभव पत्करावा लागला.
भारताचा स्टार वेगवान गोलंदाज शमीच्या मार्गदर्शनामुळे त्याचे गोलंदाजीचे तंत्र सुधारण्यास कशी मदत झाली याचा खुलासा आकाशने केला. सामन्यानंतर आकाश म्हणाला, 'मी शमीचा सल्ला घेतो कारण आमची गोलंदाजी खूप सारखी आहे. मी त्याला राउंड द विकेट बॉलिंग करताना डाव्या हाताच्या फलंदाजासाठी चेंडू बाहेर कसा काढायचा हे विचारले. ज्यासाठी त्यांनी मला त्यात जास्त प्रयत्न करू नयेत कारण ते नैसर्गिकरित्या घडेल असे सांगितले. शमीचा सल्ला आकाशसाठी उपयुक्त ठरला आणि दुलीप ट्रॉफीच्या सुरुवातीच्या सामन्यात या खेळाडूने उत्कृष्ट नियंत्रण आणि इन-स्विंग आणि आउट-स्विंग गोलंदाजीसह फलंदाजांना त्रास दिला.
फलंदाजी आणि गोलंदाजीसह संघाची रणनीती अधिक चांगली होऊ शकली असती, असे आकाशचे मत आहे. तो म्हणाला, आम्ही गोलंदाजांनी योग्य रणनीती बनवली नाही. आम्हाला गोष्टी कठीण ठेवाव्या लागल्या. आमची रणनीती चहाच्या वेळेपर्यंत खेळायची होती, कारण शेवटचे सत्र कठीण जाऊ शकते. पण आम्ही घाईत काही चुकीचे शॉट्स खेळले ज्यामुळे आमच्यावर दडपण आले.
या मोसमात भारताला दहा कसोटी सामने खेळायचे आहेत आणि दुलीप करंडक स्पर्धेतील आकाशच्या कामगिरीमुळे त्याला जसप्रीत बुमराह आणि मोहम्मद सिराज यांच्यानंतर तिसरा वेगवान गोलंदाज निश्चितच एक मजबूत पर्याय आहे. आकाश मात्र भविष्याचा फारसा विचार न करता वर्तमानावर लक्ष केंद्रित करतो. तो म्हणाला, मी खेळतो तो प्रत्येक सामना मी माझा शेवटचा सामना मानतो. मी फार पुढचा विचार करत नाही. मी फक्त वर्तमानाचा विचार करतो.
या वर्षाच्या सुरुवातीला रांची येथे इंग्लंडविरुद्ध कसोटी पदार्पण करणाऱ्या आकाशने प्रदीर्घ कालावधीनंतर लाल चेंडूच्या स्वरूपात पुनरागमन केले आहे. बंगालच्या खेळाडूने सांगितले की, तो आपल्या पद्धतीने मोसमाची तयारी करत आहे. आकाशदीप म्हणाला, रांची आणि आयपीएलमध्ये भारतासाठी पदार्पण केल्यानंतर मी एकही स्पर्धात्मक सामना खेळलो नाही. एवढ्या प्रदीर्घ गॅपनंतर वेगवान गोलंदाज म्हणून सामने खेळणे अवघड आहे, पण मी गेल्या महिन्यापासून सराव करत आहे. आम्ही सराव सामने खरे सामने म्हणून खेळत होतो. त्यामुळे, आपल्या स्नायूंना अशा प्रकारच्या गोलंदाजीची सवय लावण्याची आमची मानसिकता होती आणि त्यामुळे मला खूप मदत झाली.
आगामी ऑस्ट्रेलिया दौरा बघता भारत आपला वेगवान मारा जास्तच तिखट करून घेण्यासाठी अशा हरहुन्नरी खेळाडूंना तयार करत आहे व भविष्यात भारताच्या वेगवान गोलंदाजीचा आधारस्तंभ नक्कीच बनतील अशी आशा करूया.
लेखक : -
डॉ.दत्ता विघावे
क्रिकेट समिक्षक
मो. क्रं - ९०९६३७२०८२
