दहिगाव पंपहाऊस येथे २४० अश्वशक्तीचे दोन विद्युत पंप खरेदीसाठी शासनाकडून १ कोटी ४० लाख रुपयांचा निधी मंजूर
प्रतिनिधी: सुर्यकांत होनप
करमाळा: दि. १६/ करमाळा शहरासाठी उजनी जलाशयातून पाणी पुरवठा करणाऱ्या दहिगाव पंपहाऊससाठी दोन विद्युत पंप खरेदीसाठी शासनाकडून १ कोटी ४० लाख रुपयांचा निधी मंजूर झाल्याची माहिती आमदार संजय मामा शिंदे यांनी दिली. करमाळा शहरासाठी उजनी जलाशयातून पाणी पुरवठा करणाऱ्या दहिगाव पंपहाऊस येथे २४० अश्वशक्तीचे दोन विद्युत पंप खरेदीसाठी नगरपरिषद प्रशासनाने निधीची मागणी केल्यानंतर आमदार संजयमामा शिंदे यांनी अवघ्या महिनाभरातच शासनाकडून १ कोटी ४० लाख रुपयांचा निधी मंजूर करून घेतला असून यामुळे आता करमाळाकरांसमोरील कृत्रिम पाणीटंचाईचे संकट लवकरच संपुष्टात येणार आहे.
१९९३ साली दहिगाव येथून कार्यान्वित झालेल्या या योजनेसाठी २४० अश्वशक्तीचे दोन व २०० अश्वशक्तीचा एक असे तीन पंप बसवण्यात आलेले असून हे पंप जुने झाल्याने बिघाड, दुरुस्ती या कारणामुळे शहराचा पाणीपुरवठा उजनीत तुडुंब असतानादेखील वारंवार विस्कळीत होत असल्याने निर्माण होणाऱ्या कृत्रिम पाणीटंचाईमुळे शहरवाशीय हैराण झालेले होते. आता आमदार शिंदे यांच्या माध्यमातून पंप खरेदी करण्यासाठी तातडीने निधी मंजूर झाल्याने नवीन पंप बसविल्यानंतर शहरासमोरील पाणीसंकट कायमस्वरूपी दूर होणार असल्याने शहरवाशीय आणि विशेषतः महिला वर्गाकडून आमदार संजयमामा शिंदे यांना धन्यवाद देण्यात येत आहेत. गेल्या अनेक वर्षांपासून पाणीटंचाईमुळे शहरवाशीय त्रस्त झालेले होते. मात्र याविषयी या आधीचे लोकप्रतिनिधी आणि पालिका प्रशासन हे पूर्णतः बेफिकीर व निष्क्रिय होते. परंतु आता प्रशासनाच्या मागणीनंतर आमदार संजयमामांनी तातडीने निधी उपलब्ध करून दिल्यामुळे ही पाणीटंचाई संपणार आहे. या कार्यतत्परतेबद्दल महिलावर्गाकडून मामांना धन्यवाद देण्यात येत आहेत.
