श्रीरामपूर / प्रतिनिधी:
श्रीरामपूर येथील रयत शिक्षण संस्थेचे डी डी काचोळे माध्यमिक विद्यालयामध्ये स्व.दत्ताजी दाजीबा काचोळे यांची शंभरावी जयंती सोहळा विद्यालयात साजरा करण्यात आला. विद्यालयाचे मुख्याध्यापक सुनील साळवे सर तसेच माजी शिक्षक श्री पोपटराव शेळके सर यांच्या शुभ हस्ते प्रतिमेचे पूजन करण्यात आले. त्याचबरोबर विद्यालयाच्या सेमी विभागांमध्ये प्रतिमा पूजन करण्यात आले. याप्रसंगी विद्यालयाचे पर्यवेक्षक श्री बाळासाहेब रासकर, ज्येष्ठ शिक्षक श्री संतोष सोनवणे, सौ मनीषा घावटे, सौ स्नेहा निंबाळकर, उपस्थित होते.
काचोळे भाऊसाहेब यांनी वकिली व्यवसाय श्रीरामपूर मध्ये सुरू केल्यानंतर बहुजन समाजासाठी साक्षरता कार्य हाती घेऊन १९५३ साली जनता माध्यमिक विद्यालयची स्थापना केली. विद्यालयासाठी लागणारी आर्थिक मदत, निधी उभी करण्यासाठी त्यांनी आपल्या कलेचा उपयोग करून समाजामध्ये विविध विषयांवर ५२ नाटके सादर केली व मिळणारी रक्कम विद्यालयाच्या प्रगतीसाठी वापरली. रयत शिक्षण संस्थेचे संस्थापक पद्मभूषण डॉ. कर्मवीर भाऊराव पाटील यांच्या एका शब्दावर शहरातील जनता विद्यालय, इमारत प्रांगणासहित विनाअट संस्थेस दान केली. यातून त्यांचा थोर दानशूरपणा लक्षात येतो.
याप्रसंगी विद्यालयाचे उपशिक्षक रवींद्र निकम यांनी काचोळे भाऊसाहेब यांच्या सामाजिक व शैक्षणिक कार्याबद्दल मनोगत व्यक्त केले. त्याचबरोबर कु.प्रतीक्षा भागडे, पुष्कर मोरे, ओंकार काटे व प्रतिक लांडगे या विद्यार्थ्यांनी आपले मनोगत व्यक्त केले.कार्यक्रमासाठी विद्यालयाचे सर्व शिक्षक शिक्षकेतर कर्मचारी विद्यार्थी उपस्थित होते.
संकलन
समता न्यूज सर्व्हिसेस, श्रीरामपूर - ९५६११७४१११
