*खरवली कडे जाणाऱ्या बायपास रस्त्याचे काम लवकरात लवकर करावे - नागरिकांची मागणी
बोरघर / माणगाव : विश्वास गायकवाड
मुंबई गोवा राष्ट्रीय महामार्गाच्या चौपदरीकरणाचे काम गेली सतरा वर्षे रखडले आहे. संबंधित राष्ट्रीय महामार्ग चौपदरीकरण कामाच्या ठेकेदाराने आपल्या सोई प्रमाणे या राष्ट्रीय महामार्गाच्या चौपदरीकरणाचे काम अत्यंत धिम्या गतीने सुरू ठेवले आहे. त्यामुळे या राष्ट्रीय महामार्गाची ठिक ठिकाणी अत्यंत दयनीय अवस्था निर्माण झाली आहे. महामार्गावरील अनेक ठिकाणी असलेल्या मोठ मोठ्या खड्ड्यांमुळे आणि डायव्हरसन मुळे या राष्ट्रीय महामार्गावर वेगवेगळ्या ठिकाणी आणि उपरोल्लेखित खरवली फाटा ओपन अंब्रेला हॉटेल समोरील खरवली गावाकडे जाणाऱ्या बायपास मार्गाच्या आसपास भीषण अपघात होऊन अनेक निष्पाप लोकांना, कुटुंबांना आपले अनमोल प्राण गमवावे लागले आहे.
मुंबई गोवा राष्ट्रीय महामार्ग हा राज्यातील प्रमुख राष्ट्रीय महामार्गा पैकी एक असून हा महामार्ग मोठ्या रहदारीचा महामार्ग म्हणून ओळखला जातो. देशाच्या उत्तर आणि दक्षिण टोकाला जोडणारा हा राष्ट्रीय महामार्ग शासन, प्रशासन आणि ठेकेदारांच्या अक्षम्य नाकाम वृत्तीमुळे तब्बल सतरा वर्षे प्रलंबित राहिला आहे. या राष्ट्रीय महामार्गाच्या निकृष्ट दर्जाच्या कामा विरोधात आणि प्रलंबित रटाळ चौपदरीकरणाच्या कामा विरोधात मराठी पत्रकार संघाचे विश्वस्त एस.एम. देशमुख यांच्या नेतृत्वाखाली रायगड प्रेस क्लब च्या माध्यमातून अनेक प्रकारची आंदोलने केली, निवेदने दिले मात्र निष्ठूर प्रशासकीय यंत्रणेने आणि संबंधित कामाच्या ठेकेदाराने या कडे वारंवार अक्षम्य दुर्लक्ष केले आहे. त्यामुळे या राष्ट्रीय महामार्गावर अनेक ठिकाणी अनेकदा मोठ मोठे अपघात होऊन अनेक निष्पाप लोकांचे बळी गेले आहेत.
मुंबई गोवा राष्ट्रीय महामार्गावर माणगाव कडून मुंबई च्या दिशेने जाताना खरवली फाटा ओपन अंब्रेला हॉटेल समोर साले, उमरोळी, खरवली, चेरवली, पेण, आमडोशी, बोरघर, उसर, चरई, तळेगाव, बोरीचा माळ, म्हसळा, तळा, मुरूड इत्यादी पर्यटनस्थळाकडे जाणारा रस्ता आहे. या जोड रस्त्याकडे जाणाऱ्या वाहन चालकांना जीव धोक्यात घालून महामार्गाच्या पश्चिमेस खरवली कडे जावे लागते. खरवली फाटा या ठिकाणी खरवली कडून माणगाव, इंदापूर कडे येणाऱ्या वाहनांना सदर राष्ट्रीय महामार्ग क्रॉस करण्यासाठी महामार्गाच्या खाली मोठी मोरी तथा सबवे ची व्यवस्था केली आहे. मात्र माणगाव कडून खरवली कडे जाणाऱ्या वाहनांना जाण्यासाठी सोयीस्कर असलेल्या पश्चिमेकडील बायपासचे काम अद्याप अपूर्ण ठेवले असल्याने या ठिकाणी वाहन चालकांची मोठी गैरसोय होते. कारण या ठिकाणी ठेकेदाराने खरवली कडे जाणाऱ्या बायपास मार्गाचे काम अद्याप केलेले नाही. त्यामुळे महामार्गावरून भरदाव येणारे वाहन चालक अचानक खरवली फाट्यावर आल्यावर खरवली कडे जाण्यासाठी वाहनाची गती कमी करतो त्यामुळे मागून भरधाव येणाऱ्या वाहन चालकांना आपल्या वाहनाचा वेग कमी करण्यासाठी मोठी कसरत करावी लागते. या मुळे या ठिकाणी अपघात होण्याची शक्यता नाकारता येत नाही. त्यामुळे संबंधित ठेकेदाराने या समस्येवर मात करण्यासाठी लवकरात लवकर या ठिकाणच्या बायपास चे काम शीघ्र गतीने करावे अशी नागरिकांकडून मागणी केली जात आहे.
*संकलन*
समता मीडिया सर्व्हिसेस श्रीरामपूर - 9561174111
