सांगली ( संभाजी पुरीगोसावी):- जिल्ह्यातील कराड शहर वाहतूक पोलिसांनी सतर्कतेमुळे चोरीची मोटरसायकल हस्तगत करत संशयित आरोपीला अटक केली आहे. या कारवाईत निरंजन सोमनाथ साळुंखे (वय 22, रा. मासाळ टेक, म्हसवड ता. माण, सध्या रा. खोडशी ता. कराड) या व्यक्तीला पोलिसांनी अटक केली आहे.
कारवाईचा तपशील...
कराड शहर वाहतूक पोलीस उपनिरीक्षक संतोष जगदाळे हे कर्तव्यावर असताना दुचाकी वाहनांची तपासणी करत होते. यावेळी एका विना नंबर प्लेट असलेल्या दुचाकीला थांबवण्यात आले. वाहनचालकाकडे वाहन चालवण्याचा परवाना मागितला असता, त्याने उडवाउडवीची उत्तरे दिली. त्यामुळे पोलिसांनी संशय वाढून अधिक चौकशी केली. चौकशीदरम्यान, सदर दुचाकी चोरीची असल्याची कबुली आरोपीने दिली.
आरोपीला अटक व मोटरसायकल हस्तांतरण...
वाहतूक पोलिसांनी ताब्यात घेतलेला आरोपी व चोरीची दुचाकी पुढील तपासासाठी भिलवडी पोलिसांच्या ताब्यात दिली आहे. यामुळे वाहतूक पोलिसांच्या सतर्कतेमुळे चोरीचे वाहन ताब्यात घेऊन चोरीचा गुन्हा उघडकीस आणला गेला.
पोलीस अधिकाऱ्यांचे मार्गदर्शन व सहभाग...
ही यशस्वी कारवाई जिल्हा पोलीस अधीक्षक समीर शेख, अप्पर पोलीस अधीक्षक डॉ. वैशाली कडुकर, उपविभागीय पोलिस अधिकारी डॉ. अमोल ठाकूर यांच्या मार्गदर्शनाखाली करण्यात आली. वाहतूक नियंत्रण शाखेचे प्रभारी अधिकारी संदीप सूर्यवंशी, पोलीस उपनिरीक्षक संतोष जगदाळे आणि वाहतूक पोलिसांनी या कारवाईत महत्त्वाचा सहभाग घेतला.
वाहतूक पोलिसांची सतर्कता – जनतेसाठी उदाहरण.
या घटनेमुळे कराड शहर वाहतूक पोलिसांच्या सतर्कतेचे कौतुक होत आहे. जनतेच्या सुरक्षा आणि कायदा सुव्यवस्थेसाठी वाहतूक पोलिसांचे योगदान महत्त्वपूर्ण आहे. अशी सतर्कता अन्य गुन्हे रोखण्यासाठी उपयुक्त ठरणारी आहे.
