एरंडोल येथे अवैध गौण खनिज वाहतूक प्रकरणात जप्त वाहनांचा यशस्वी लिलाव.

एरंडोल, १६ जानेवारी २०२५ - अवैध गौण खनिज वाहतूक प्रकरणात पकडण्यात आलेल्या नऊ वाहनांपैकी सात वाहनांचा रुपये १७,५६,८२७ रकमेत जाहीर लिलाव तहसीलदारांच्या दालनात यशस्वीरित्या पार पडला. दोन वाहनधारकांनी लिलावापूर्वीच दंडाची रक्कम भरून आपली वाहने मोकळी करून घेतली, त्यामुळे ती वाहने लिलावात समाविष्ट नव्हती.  

लिलाव प्रक्रिया आणि सहभाग...

लिलाव प्रक्रियेमध्ये एकूण १८ इच्छुक लिलावधारकांनी सहभाग घेतला. या वाहनांमध्ये एक जेसीबी व सहा ट्रॅक्टर यांचा समावेश होता.या वाहनांवर एकूण रुपये१६,४५,७१०इतकी दंडाची रक्कम लावण्यात आली होती. लिलावाचे आयोजन तहसीलदार प्रदीप पाटील यांच्या नेतृत्वाखाली करण्यात आले. या प्रक्रियेत निवासी नायब तहसीलदार संजय घुले, महसूल सहाय्यक अधिकारी मधुकर नंदनवार आणि महसूल सहाय्यक राजेंद्र यादनिक यांनी महत्त्वाची भूमिका बजावली.  

अवैध खनिज वाहतुकीवर कारवाईचा भाग..  

ही कारवाई अवैध गौण खनिज वाहतुकीवर कडक पाऊल उचलण्याच्या उद्देशाने करण्यात आली. या प्रकारामुळे महसुली नुकसान टाळणे आणि कायद्याची अंमलबजावणी करणे हे मुख्य उद्दिष्ट ठरवले गेले आहे.  लिलाव प्रक्रियेच्या यशस्वीतेमुळे प्रशासनाने महसूल मिळवण्यात यश मिळवले असून, भविष्यात अशा प्रकारांवर कठोर कारवाई करण्याचा निर्धार व्यक्त केला आहे.